សម្តេចតេជោ ហ៊ុន សែន ជំរុញឲ្យមន្រ្តីកុំធ្វើជាមន្រ្តីជើង១០គឺត្រូវតែធ្វើមន្រ្តីជើង២
20-June-2016 | ដោយ មែន កំសត់
ភ្នំពេញ៖នៅព្រឹកថ្ងៃទី២០មិថុនានេះ សម្តេចតេជោ ហ៊ុនសែននាយករដ្ឋមន្ត្រីនៃកម្ពុជាបានចូលរួមបិទវគ្គប្រគល់សញ្ញាបត្រ ដល់សិស្សមន្ត្រីជាន់ខ្ពស់ជំនាន់ឧត្តមគតិជាតិ សិស្សមន្ត្រីក្រមការជំនាន់សាមគ្គីជាតិ និងវិញ្ញាបនបត្រកម្មសិក្សាការីមន្ត្រីជាន់ខ្ពស់ មន្ត្រីមធ្យមឆ្នាំ២០១៥ សិក្ខាកាមមន្ត្រីក្រសួងបរិស្ថាន សិក្ខាកាមថ្នាក់ដឹកនាំជាស្ត្រី ព្រមទាំងបើកវគ្គបណ្ដុះបណ្តាលឆ្នាំ ២០១៦ របស់សាលាភូមិន្ទរដ្ឋបាលចំនួន ៩១៥។
ក្រោយការចូលរួមពិធី សម្តេចតេជោបានសរសេរបង្ហោះក្នុងបណ្តាញសង្គមហ្វេសប៊ុកថា"ខ្ញុំ សូមអបអរសាទរនិងកោតសរសើរដល់ជ័យលាភីទាំងអស់ និងសូមកោតសរសើរដល់សាលាភូមិន្ទរដ្ឋបាលដែលបានប្រឹងប្រែង បណ្តុះបណ្តាលធនធានមនុស្ស ជាពិសេសមន្ត្រីរបស់រាជរដ្ឋាភិបាលកម្ពុជាអោយកាន់តែមានសមត្ថភាព ពេញលេញប្រកបដោយស្មារតីទទួលខុសត្រូវខ្ពស់"។
ទោះជាយ៉ាងណា សម្តេចតេជោបានក្រើនរំលឹកថា"សូមធ្វើមន្ត្រីជើងពីរ កុំធ្វើមន្ត្រីជើង១០ហើយក៏មិនត្រូវធ្វើជាមន្ត្រីគ្រាប់ល្ពៅដែរ ។ មន្ត្រីជើងពីរមានការទទួលខុសត្រូវ និងចេះចុះជួយដោះស្រាយប្រជាពលរដ្ឋប្រកបដោយការទទួលខុសនិងត្រូវនិង ចេះធ្វើការរួមគ្នាជាក្រុម។ កុំប៉ែងជើងគ្នា និងកុំក្តិចត្រួយ បើមានមន្ត្រីណាមានសមត្ថភាពពិតប្រាកដគឺយើងរុញឡើង។ហើយចំពោះ មន្ត្រីដែលបានធ្វើធំហើយ ក៏មិនត្រូវភ្លេចមន្ត្រីតូចតាចដែរ"។
ឆ្លៀតពេនេះ សម្តេចសូមអភ័យទោសជាសាធារណៈផងដែរដែលកាលពីពេលថ្មីៗនេះសម្តេចបាន ជិះម៉ូតូនៅខេត្តកោះកុងមិនបានពាក់មួកសុវត្ថិភាព។ សូមបងប្អូនប្រជាពលរដ្ឋគោរពច្បាប់ចរាចរណ៍ ហើយត្រូវតែពាក់មួកការពារសុវត្ថិភាពគ្រប់ពេល ទោះបីជិះម៉ូតូជិតឬឆ្ងាយក៏ដោយ។
ព្រឹកមិញនេះ សម្តេចបានបញ្ជាក់ផងដែរអំពីជំហរកម្ពុជាចំពោះ បញ្ហាសមុទ្រចិនភាគខាងត្បូង ។ តំបន់ណាដែលប៉ះពាល់ទ្វេភាគី គឺទុកអោយទ្វេភាគីដោះស្រាយ រីឯតំបន់ណាដែលមានបញ្ហាពហុភាគីគឺទុកអោយពហុភាគីជាអ្នកដោះស្រាយ។ កម្ពុជាមិនមែនជាចៅក្រមកាត់សេចក្តីទេ ប៉ុន្តែកម្ពុជាដើរតួនាទីក្នុងការសម្របសម្រួលប្រទេសក្នុងតំបន់អោយបាន រស់នៅក្នុងសុខដមនីយកម្មជាមួយគ្នា។ សម្តេចស្នើសុំអោយ ប្រទេសទាំងអស់កុំប្រើកម្លាំងដោះស្រាយ ប៉ុន្តែរួមគ្នាធ្វើក្រមប្រណិបត្តិ(COC)។ជំហររបស់កម្ពុជាគឺមិន ចេញសេចក្តីគាំទ្រលើសេចក្តីសម្រេច ឬសេចក្តីថ្លែងការរបស់តុលាការទេ។ ដូច្នេះសម្តេចមិនអោយបរទេសប្រមាថមាក់ងាយកម្ពុជាទេ ហើយក៏មិនអាចទទួលការចោទប្រកាន់ទម្លាក់កំហុសរឿងសមុទ្រចិនភាគ ខាងត្បូងមកលើកម្ពុជាដែរ។ គឺសូមអាព្យាក្រិត និងយុត្តិធម៌លើរឿងនេះ។
ចុងបញ្ចប់នៃសារក្នុងហ្វេសប៊ុក សម្តេចតេជោសូមប្រគេនពរ និងជូនពរដល់ព្រះតេជគុណ និងជ័យលាភីទាំងអស់សូមជួបតែសំណាងល្អ និងមានអនាគតល្អគ្រប់ៗគ្នា៕
ចំនួនអ្នកទស្សនា
- ថ្ងៃនេះ841
- ម្សិលមិញ4911
- សប្តាហ៍នេះ18411
- ខែនេះ841
- ឆ្នាំនេះ244081
- សរុប20686537